header_kirchliches_leben.jpg

Karl Knutti

von Därstetten und Diemtigen, in Weissenburg, Eich, mit Aufenthalt in Erlenbach, Lindenmatte

geb. 15.7.1928;gest. 12.3.2021;best.18.3.2021

Dr Karl Knutti isch am 15. Juli 1928 als Sohn vom Karl und dr Elise Knutti-Jaggi gebore worde. Er isch ds erschte Ching vomEhepaar Knutti gsi. D’Familie isch gwachse, es si no drü Schwöschtere d’Lisabeth, ds Vreni u d’Esther derzue cho u zwe Brüeder, dr Arnold u dr Jakob u de no dr Halbbrueder Poul. Dr Kari isch im Mattestalde uf d’Wält cho, i dr gliche Stube, wo e Wuche druf, dr Alfred Bettler, si Cousin, gebore worde isch. Die beide hei viel Zyt vo ihrere Chindheit u Jugend zäme verbrunge. D’Familie Knutti isch, wo dr Kari no chli isch gsi, i d’Eich züglet. Ds Schuel isch dr Kari ds Därstette gange. Wie’s zu däre Zyt Bruuch isch gsi, hei d’Ching scho früech Dehei ghulfe apacke. Während em zwöite Wältchrieg het dr Kari, bevor er i d’Schuel isch gange, no zu de Guschti müesse luege, weil dr Vater izoge worde isch. Dr Bueb isch nume schwär dermit z’rächtcho, dass si Brueder a de Folge vom ne Unfall gstorbe isch. Em Sunntig isch d’Familie Knutti i d’Versammlig vom Brüederverein gange. Im Brüederverein ds Frutige isch er de o konfirmiert worde.

Nach dr Konfirmation, wo o grad die obligatorischi Schuelzyt abgschlosse het, het dr Kari uf em Betrieb vo de Eltere gschaffet. 1948 het dr Kari sich gstellt zäme mit em Alfred Bettler. Beidi si es Jahr zrügggstellt worde, weil sie z’wenig Bruschtumfang gha hei. Es Jahr später het er de d’Rekruteschuel bim Train gmacht ds Wange. Mängs isch ihm us däre Zyt i beschter Erinnerig bliebe. Dr Kari isch füfezwänzgi gsi, wo si Vater gstorbe isch. Er het näb em Bärg no em Vater si Arbeit überno u so d’Muetter u si chli Brueder, wo no i d’Schuel isch gange, ungerstützt. Im Früehsummer isch dr Kari zersch uf d’Lampere, de witer uf ds Grätli gange. Mänge schöne, runde Chäs het er gmacht. Stolz het er de Lüt dr Chäschäller zeigt. Dr Transport vom Chäs i ds Tal isch müehsam u ufwändig gsi. Dr Kari isch no nid füfezwänzgi gsi, wo er e Forschtkurs bsuecht het. A dr Nordrampe vom Lötschbärg het er 1952 no Tanne u Ahorn gsetzt. Es isch e strängi Zyt gsi, wo dr Kari im Wald u i dr Landwirtschaft gschaffet het. Mit Stolz het dr Kari de d’Stabbäle zeigt, wo vo dr Holzgmeind Weisseburg-Zwüschebach für sini tröiie Dienschte übercho het. Im Summer uf em Grätli het dr Kari zwe Statterbuebe gha. Eine vo ihne isch dr Ueltschi Hans gsi. Er het de o als landwirtschaftleche Agstellte bim Kari Knutti gschaffet. Am meischte, so het dr Kari später verzellt, het er achtezwänzg Chüeh uf em Bärg gha, wo er vo Hang gmulche het. Em wenigschte sis nume vierzäh gsi. We dr Kari uf em Bärg isch gsi, hei zwe Cousin, dr Fritz u dr Arthur, im Tal ghöiet. Für es paar Jahr isch de dr Kari im Tal bliebe u het ds Fuetter für d’Chüeh gmacht. Es isch afangs vo de siebzger Jahr gsi, wo uf ds Grätli e Seilbahn boue worde isch. Das het d’Arbeit viel eifacher gmacht. O dr Stall isch umboue worde i däre Zyt. Itz het ds Ross em Kari nüme bim Zmorge chönne zueluege. Weil dr Kari psychischi Problem het übercho, isch er i die psychiatrischi Klinik gange. Uf em Grätli het d’Familie Steiner i däre Zyt zum Rächte gluegt. Es isch ihm wieder ganz gäbig gange u er het wieder chönne schaffe. Scho längschtens het er d’Schriebarbeite vom Wald em Hadorn Walter überlah. 1985 het dr Kari de wäge sine Ouge d’Forschtarbeit ganz müesse ufgä. Schritt für Schritt het er sis Heimet de übergäh. Dr Kari isch zwöieachzgi gsi, wo er sis letschte Tier, e Jährling, het wäggäh. D’Eich het er a Res verchouft dr Sohn vom Arthur sim Cousin. Er sälber het ds Wohnrächt bhalte. Me het ds Jahr 2011 gschriebe, wo ds Alleinisi dr Kari het afah drücke u er immer meh uf Hilf agwiese isch gsi. Er het de beschlosse, i ds Altersheim Lindematte, ds Erlebach z’zügle. Dert isch er guet ufghobe gsi. Es isch ihm wohl gsi, aber d’Eich het’s nie chönne ersetze. U er het immer gnau wölle wüsse, was dert geit. Körperlech isch es ihm immer e chli schlächter gange. Aber immer isch er gärn a d’Altersnamittage ds Därstette gange u het o i dr Bibugruppe ds Erlebach mitgmacht. Zyt vo dr Pandemie het de o dr Kari gforderet, het er doch uf mänge Bsuech müesse verzichte. Liebevoll umsorgt vom Personal u tröi begleitet vo dr Familie Andreas u Fränzi Knutti u ihrne Ching isch dr Kari Knutti am 12. März 2021 für immer igschlafe.