Susanna Katharina Bühler - Perren

Geb. 22.02.1944 / Gest. 07.09.2024 / Best. 17.09.24

Wohnhaft im Häberling, danach einige Jahre in St. Stephan

Lebenslauf von Susanna Katharina Bühler-Perren

Uesi Muetter isch am 22. Februar 1944 als Aeltischti vo vier Chind i re Chüiherfamilie uf d’Wält cho. Sie isch drü Mönet alt gsi, wo sie zerschte Mal i re grosse Hutte – unger ihre si Hühner gsi - am Rügge vo ihrem Aetti z’Bärg züglet isch.Ds Zügle het sich vo da a wie e rote Fade dür ihres Läbe zoge. D’Chinder- u Jugendjahr het sie mit ihrere Familie uf em Bärg verbrunge. I däre Zyt het ds Susikäthi es Idol gha; Nei, weder e Musiker no e Sportskanone. Es isch ihre gross Hlabbrueder, dr Köbu gsi. Scho gli einisch isch sie stolz gsi, wo sie tifiger mit meh Schuum im Mälchterli als ihri Brüeder vor em Aetti gstande isch.

Sie het sich o gfröit, wo d’Schuel sie grüeft het. Mit grossem Inträsse u Ifer isch sie nün Jahr i ds Hüsere Schulhus, St. Stephan ds Schuel gange. Am liebschte het sie grächnet, aber o am Handsche het sie grossi Fröid gha. Sie isch halt scho als Meitschi gschickt gsi im lisme, häggle u näihe.

Nach dr obligatorische Schuelzyt het’s gheisse am Chüiherläbe, wo sie so gärn het gha, Adie z’säge. Ds Susikäthi het ds Hushaltslehrjahr ds Spiez gmacht. Es isch für sie e längi Zyt gsi. Derna isch sie bi Ueltschi’s ds boltige als Chöchin agstellt worde. Dert het sie o ihre Ehema, ds Bühler Hänsi lehre chenne. Nach em ne churze bruefleche Abstächer i d’Wöschchuchi i dr psyhciatrische Klinik Riggisberg, hei die Beide am 18.Mai 1963 ghürate. Scho im erschte Summer, wo sie zäme si gsi, si sie z’Bärg züglet. Das het sich mit Ungerbrüch vierzg Mal wiederholt. Bärguf – Bärgab, nie ohni Rucksack am Rügge.

Mit dr Zyt isch d’Familie mit drü Ching komplett worde. Im Februar 1984 isch dr Alexander schwär verunfallt. Uesi Muetter het sich nie richtig vo däm Schock chönne erhole. Drü Jahr später isch ihres erschte Grosschind, d’Sahra uf d’Wält cho. Das het wieder Sunne i die Mutterseele brunge, wo so erschütteret isch gsi. D’Muetter het sich fescht um üsi Sarah chümmeret. Sie het sich o sehr über die drü witere Grosschind gfröit. 1993 het sech üsne Eltere d’Müglechkeit bote es chlises Hus mit e chli Umschwung z’choufe. Wieder het d’Muetter ihres Hab und guet zämepackt u ds Ehepaar isch zum füfte Mal züglet.

Im Häberling het ihri Liebi em Garte ghört u allem, wo ds Härz gfröit het. Sie het dert wahrschinlech ihri glücklechschte Jahr erläbt. Näbe ihrne Hobbys em Glasmale, dr Pfleg vo de Blueme u de Handarbeite, het sie sech o im Froueverein engagiert. Dr Ustuusch mit de Froue het derzue bitreit, dass sie sech gli wohl gfühlt het i dr nöiie Heimat.

Immer alli mit Chueche u Kaffee z’bewirte, d’Grosschind z’hüete u mit Papa chli Usflüg z’ungernäh, het sie glücklech gmacht.

Im Mai 2013 het sie die guldigi Hochzyt chönne fiire. Vo da a, isch Papa immer chränker u gebrächlicher worde. D’Muetter het ihn pflegt bis er i dr Silveschternacht 2015 d’Ouge für immer zueta hetO bi dr Muetter si itz immer meh Bräschte derzue cho. Ihre Körper het ke Chraft meh gha. Im Häberling isch sie sech alleini vorcho, u so het sie sech entschlosse am 1.Septämber 2019 no einisch z’zügle, i ds Altersheim Dorfmatte i ihrere alte Heimat St. Stephan. Der tisch sie zersch i re chline Wohnig gsi, wo sie leider nach em ne Sturz het müesse ufgäh.

Die viele Büsech vo Verwandte u Bekannte hei Täg u d’Wuche, wo vo Schmärze u Leid zeichnet si gsi, es bitzeli erträglecher gmacht. Trotz dr liebevolle Pfleg im Heim isch d’Muetter immer schwächer worde u het am 7. Septämber 2024 für immer dörfe ischlafe.

Für di letschti Züglete hesch nüme müesse packe. Häb Dank für dini Güeti, dini Früsorg u alles, wo du gmacht hesch.

Schlaf guet, uf Wiederluege.