Thomas Abbühl

von Därstetten, in Weissenburg, Friberig

geb. 22.1.1978; gest. 13.6.2023; best. 21.6.2023

Lebensluuf Thomas Abbühl

Uese Thomas isch am 22. Januar 1978 uf d’Wält cho. Ae härzige chline Rotschopf, ds erschte Chind vor Barbara u Hanspeter. Vier Jahr speter isch Matthias derzue cho, u no mau vier Jahr speter het d’Fabienne ds Abbühl-Trio komplett gmacht. Mir hi e wunderbari, erfüllti Chindhiit gha. Aes het üs a nüt gfehlt. U o we dr Altersunterschiid isch da gsi, mir hi doch viu zeme gmacht u erläbt.

Uese Töggelichaschte het so menge engumchämpfte Match müesse ertrage, äs Wunder hets dä so lang mitgmacht. Dr Gross u di Chlini gäge Mittler… u si nes d’Bäueli usgange, hi mr eifach Muuetis stiherte Schoggelachrugeli als Ersatz gno. Iffallsriich si mir gsi! Settigi Momänte si unvergässlech u unbezahlbar.

Als chhline Bueb isch Thomas viel bi Grosi u Grossatt gsi. Zu ihne beidne het är e spezielli Bindig gha, u die isch blibe – äs Läbe lang.

Die erschte vier Schueljahr het är ir Prim z’Därstette absolviert. När abem füfte Schuljahr isch är i d’Sek z’Erlebach. Nach sire Usbildig zum Fahrzüggelektriker het er no e Chehr uf sim Job gschaffet.

Scho ab dr erschte Klass isch dr Thomas i de Summerferie lieber i d’Chüehwiid zu Tante Ruth u Ungle Roland als a ds Meer. Dr Bezug zur Natur isch ihm bliebe. Mehrmals isch Thomas mit Fründe uf Bäärgtoure oder i d’Wanderferie.

O mir ir Familie si ir letschte Zyt viel zeme usi. Ga brätle, ga wandere oder eiifach gmüetlech zemesii. D’Chind hi Ungle u Götti Thomas gern gha – u er si o.

Sini Freizyt i Jugendjahr het Thomas als erschts uf em Schuttplaatz verbracht. Agfange als Spieler, speter als Schiri. Nach sire Aktivzyt bim FC EDO Simme het är dr Verein als Passivmitglied ungerstützt.

Aebefalls ir späte Jugend het ihn z’Schiessfieber packt. Sini Lideschaft für e Schiesssport het er mit Härzbluet usgläbt.

Im Hagr 2015 hi sech bim Thomas erschti Härzproblem bemerkbar gmacht. Siner Beschwärde si geng stercher worde u hi im 2017 ä Höhepunkt erreicht. Mit viel Disziplin, Kampfgiischt u Wille het är sini Chrankheit i Griff übercho. Aes isch geng chli bärguf gange u das het ummi lah hoffe.

Ae regurächte Glücksgriff isch sini Astellig ir Zollhus Aoutomobile AG Thun gsi. Z’Team rund um e Johnny het Thomas d’Chance geh, nah dis nah ummi i d’Bruefswält i z’stiege. Die Chance het är ergiffe u äs het sich glohnt. Thomas isch es sehr wohl gsi um siner Teamkollege u o sie hi ihn gschätzt.

U hie schliesst sech dr Kreis. Am 13. Juni 2023 isch är bim Schaffe zemegheit. Z’Härz het nimme möge. Alli Reanimations-Versüech si gschitteret,, d’Aerzt hi ihm nimmme chönne hälfe. Thomas het sini letschti Reis aträte. Mögisch sicher u guet acho!

Matthias Abbühl und Fabienne Abbühl