Niklaus Abbühl-Mosimann

von Därstetten, in Weissenburg Stigimaad

geb. 5.3.1948; gest. 13.3.2024; Trauerfeier 21.3.2024

Lebenslauf Niklaus Abbühl

Dr Chlöis isch am 5. März 1948 als erschts Chind vom Liseli u Jakob Abbühl-Kappeler im Spital ds Erlebach gebore worde. D’Familie isch de gwachse u es si no drei Buebe derzue cho. D’Familie Abbühl isch i dr Stigimaad Dehei gsi. Scho als Chind si em Chlöis d’Chüeh a ds Härz gwachse u mängisch het er bi ihne im Stall gschlafe. Ueberhoupt het er viel Zyt im Stall verbrunge. U natürlech het er – wie’s denne bi Buurelüt Bruuch isch gsi – Dehei mit müesse apacke. Näb dr Hilf uf em Hof het er als Aeltischte o zu sine Brüeder gluegt. D’Schuel isch er uf Därstette. Dr Vater vo Chlöis het gschunge. U so het’s bi Abbühl’s ab u zue e Hoselupf gäh. Mit de holländische Feriegescht het dr Chlöis e gueti Beziehig pflegt. Es si schöni Fründschafte drus entstande. Nach dr obligatorische Schulzyt, wo mit dr Konfirmation abgschlosse worde isch, isch dr Chlöis i ds Wälsche. Weil si Vater aber krank worde isch, het er nach em ne halbe Jahr wieder zrügg i ds Niedersimmetal müesse. Dr Chlöis het de Buurelehr uf em Betrieb Hondrich im Bärner Oberland gmacht. Dert het er sini Margrit glehrt chenne. Scho nach em erschte Blick i d’Ouge vom angere, hei die beide Schmätterlinge im Buuch gha. Ds Militär het dr Chlöis de im Tessin absolviert. Er het viel später mängi Gschicht u mängs Erläbnis dervo gwüsst verzelle. Vier Jahr nachdäm d’Margrit u dr Chlöis sich chenneglehrt u schätze glehrt hei gha, hei sie i dr Chirche ds Därstette ghürate. Es Jahr lang isch ds Ehepaar de im Oberfrittebach a z’träffe gsi, weil sie nach em Tod vom Vater vo dr Margrit dr elterlich Hof bewirtschaftet hei. Ihres erschte Chind, d’Annegret, isch 1973 gebore worde. Us familiäre Gründ het ds Ehepaar Abbühl entschiede, wieder i d’Stigimaad z’gah u dert z’hälfe. Vier Chind si dert uf d’Wält cho: 1974 het sech ds Ehepaar über d’Geburt vo dr Fanziska gfröit, vier Jahr später hei sie d’Marlies chönne uf d’Arme näh. 1981 isch dr Martin uf d‘Wält cho u zwöi Jahr später het dr Samuel d’Familie komplett gmacht. Dr Chlöis isch e Familiemönsch gsi. D’Gschichte u Erläbnis mit sine Chind u dr Familie hei sie u ihn prägt. Es het es Familieband gäh, wo bis hüt besteiht. Derzue ghöre o die zäh Grosschind, wo d’Familie immer meh het lah wachse. Dr Chlöis isch e liebevolle u geduldige Grossatt gsi. Es het ihm nüt usgmacht, we er nach em Mittag i d’Zytig vertöift isch gsi u ds Radio im Hingergrund glüffe isch, we d’Chind einisch bim Spiele luut si worde.

Dr Chlöis het grossi Tröim gha. Mit dr Reis nach Kanada het er sich eine chönne erfülle. Er isch sehr interessiert u innovativ gsi. Ds Ehepaar Abbühl het e nöii Schüür boue, hei es Fahrsilo agschafft, hei uf Bio umgstelltu uf Muetterchuehhaltig, u de hei sie ds Fleisch agfange diräkt z’vermarkte. Sie si Piioniere gsi. Das isch nid immer eifach gsi, het’s doch Ussenandersetzige mit angerne Lüt derwäge gäh. Sie si nöii Wäge gange u hei dermit Erfolg gha. Dr Deutz u ds Papamobil, es Quad mit Kabine si sini tröie Begleiter gsi. Es het aber o zu sine Lideschafte ghört uf em Flühbärg ga z’zuune u z’holze.Dr Klöis isch i Vereine tätig gsi u het etlichi Aemter überno. Füfevierzg Jahr isch er im Summer u im Winter als Milchwäger ungerwäge gsi. Im Summer viel mit em Töff, im Winter mit sim Papamobil. Als ehemalige Schwinger isch er im Schwingerverband gsi u het d’Schwingfescht bsuecht oder de am Fernseh gluegt. Bim Samariterverein isch er nach füfzg Jahr zum Ehremitglied worde. Viel het er de o chönne verzelle vom Schnuze vo de Gmeindsstrasse. Für mängs het gulte „Nicht verzagen, Niklaus fragen“. Für es Kaffe u e Schwatz het sech dr Chlöis gärn Zyt gno. Am Sunntig isch er viel im Beret az’träffe gsi. Er het gärn es Kaffe doppu Creme gno u e Coupe Dänemark gschnouset. Das isch sowieso immer sis Dessert gsi.

Lideschaftlech gärn het er Fernseh gluegt. Sport natürlech, Skirenne u Schwinge. Aber o „1gäge 100“ het ihn i Bann chönne zieh. U d’Antworte het er viel besser gwüsst als d’Kandidatinne u Kandidate… u denne isch nüme asprächbar gsi. O we er „Mini Chuchi , dini Chuchi“ viel gluegt het, isch er nid zum ne Choch worde. Er isch Fan vom Peter Müller gsi u het sich fescht gfröit, wo dr Christian Stucki Schwingerchönig worde isch. I de letschte Jahr het er o mit sim Jasschränzli gärn e Jass chlopfet.

2010 het sich e grosse Wunsch vo ihm erfüllt: Ds Ehepaar Abbühlhet ihres Läbenswärch ihrem Sohn Martin u däm sire Familie chönne übergäh.Leider cha er Züglete i d’Stigimaad nüme miterläbe. Bis er chrank isch worde, het er uf em Hof mitghulfe. Mängisch het er e Schutzängu gha. Im Dezämber het er ganz unerwartet Diagnose übercho, dass er schwär a Chräbs erchrankt isch. Er het für sis Läbe chämpft. Am 13. März 2024 het er i dr Insle, begleitet vo sire Familie, d’Ouge für immer zueta.

Sini ruehigi u liebevolli Art hei mir sehr gschätzt u wärde sie vermisse.

Margrit Abbühl-Mosimann und Familie